! آش قالي آش قتلك : طز فامريكا

يا سيدي طز في جميع الزعماء !
ماهو كان جا فما زعيم بالمن جد في ها العالم (عربي ولا كردي) راهو ما يقول كان الحق ! أما هل ببوش بو مصة إلي يحكمو فينا كل واحد فيهم عندو منين مشدود : إلي داه فلوس وللي داه مدان الوجه فل تلافز و إلي حاشاكم ما عندوش، وللي خلي عزاها سكات ...
أكيد دوسي أمريكا و إسرائيل مفيد جدااا للحاكم التونسي (والعربي و غيرهم كيما الفرنساوي إلي يقرا مثلا ألف حساب ليهود فرنسا). ماهو منا خطاب مضروب بالسفود رافض للتطبيع و عاطي على "طز في أمريكا" متاع المرحوم (على الأقل هو كان ساعات يقول الحق) باش تكسب ثقة الشعب إلي قلبو مغلغل على بني صهيون و عمايلهم في ولاد عمنا الفلسطينيين و إلي يرى في أمريكا كل ما تمنى في حياتو و ما لقاش ... و من غادي أعمل إش تحب تحت الطاولة الدبلوماسية : بيع و اشري في العروبة و في الوطنية و دبر شوية أصفار على يسارهم واحد ... و تذكرو آش عمل حسني مبارك في أهل غزة !

باهي يا سيدي ! رانا فاهمين إلي أمريكا مقابلة إسرائيل و كفهم كبوت فارش و هل فصيل بو زوز صوردي متاع "طز في الإمبريالية" ما عادش يجد على عاقل ! على خاطر كلمة "طز" ما يقولهاش إلي خشمو فل تراب ! يا سيدي احكيو معانا بالمفروش فهمونا و زيدو أكدولنا إلي واقعنا ما يشبه إلى شي و يزيونا من الكذب ! ثماشي ما تكيدنا لاخره رواحنا و يهدينا ربي و نخدمو بقلب و رب و يجي نهار نوليو فيه خير من أمريكا ! راهو التقدم ما يجيش بأحلام اليقظة !
يكون هذا في مصلحة الوطن ... أما ظاهرلي مصلحة الوطن مسألة مجردة ياسر على ابن آدم عكس الفلوس و الشهرة و الشهوات إلي هي حوايج ملموسة ... مثلا مصلحة الوطن ما تخلصش فاتورة الماء ولا الضو و صعيب تخلص حق الخلاعة !
 
 
مل آخر ... شكون فيكم يا زعماء الغفلة نهار يقوللنا الحق ؟ 

 
1881 


04/02/2012
0 Poster un commentaire

A découvrir aussi


Inscrivez-vous au blog

Soyez prévenu par email des prochaines mises à jour

Rejoignez les 4 autres membres

 
Paperblog : Les meilleures actualités issues des blogs