خرف الي يخرف على الدنيا

يا دنيا يا حكاية لا ساس لا راس لا عرفتك كيفاش بديت و لا فهمتك على وين ناوية.
أولك بكاء و عياط و آخرتك صياح و نواح و بين الزوز وقتك هارب كيف الزاوق ما تفهموش: أقصر من لحظة عشق ولا أطول من ساعة القلق.
سنين نلوجلك في سبب و عديت منهم ما يتعد و نسيت ما كتب و مازال عندي في القلب ما نشد.
حبيتك كي تنور أيامك و كرهتك كي تبان انيابك و من حبي عطيتك عنقي تشرب منو دم جديد عطيتني بدالو هم شديد: سنين ترزن الرجلين و تهد جبل بحالو.
يا عجوز ما همها قرص تشوف الغالي والنفيس يتباع بالرخيص و تقول أنا مالي ؟ 
مليارات تعاني الأف تعيش و تحيا عالظلف و كان لزم تضرب الدف و هي تاكل في الكف من عند سي "المكي المهف" ...
يا دنيا يا غرامي حبيتك و مازالت نحبك أما الحب فناني و قلبي مات بغصتو و خلاني هايم "علماني" في بلادي براني.
يا دنيا جات فيك التكشيرة، الكلام عليك والمعنى على الجيرة: عندك حق تكبر راسك صحيح ما اختارك حد أما كل من زارك كبش في اوزارك و حلف ما يترك دارك ...
حتى أنت ساعة تحب بنينة كيف صحفة الكريمة ولا ركشة فال ... كوجينة ... تضحك في وجه الضاحك و تسخر من الدمعة الحزينة.
أما يجي يوم يا شاغلة بالي و ناقفو قدام العالي و هو أعلم بأرطالك و بأحوالي و عليه نرمي عمالي.



1881


06/03/2012
0 Poster un commentaire

A découvrir aussi


Inscrivez-vous au blog

Soyez prévenu par email des prochaines mises à jour

Rejoignez les 4 autres membres

 
Paperblog : Les meilleures actualités issues des blogs